บทขัดภิกขุอะปะริหานิยะธรรมสูตร
มหาการุณิโก พุทโธ สาสะกานัง หิเตสะโก
วุฑฒิ อากังขะมาโน วา ธัมเม สัมพุทธะเทสิเต
ภิกขูนัง สัมมะทักขาสิ สัมเม อะปะริหานิเย
สุตวานุปะฏิตยัตถัง ตัง สุตตันตัง ภะณามะ เส ฯ
ภิกขุอะปะริหานิยะธัมมะสุตตัง
เอวัมเม สุตัง ฯ เอกัง สะมะยัง ภะคะวา ราชะคะเห วิหะระติ คิชฌะกูเฏ ปัพพะเต ตัตระ โข ภะคะวา ภิกขู อามันเตสิ สัตตะ โว ภิกขะเว อะปะริหานิเย ธัมเม เทเสสสามิ ตัง สุณาถะ สาธุกัง มะนะสิกะโรถะ ภาสิสสามีติ ฯ เอวัมภันเตติ โข เต ภิกขู ภะคะวะโต ปัจจัสโสสุง ฯ ภะคะวา เอตะทะโวจะ กะตะเม จะ ภิกขะเว สัตตะ อะปะริหานิยา ธัมมา ฯ
(๑) ยาวะกีวัญจะ ภิกขะเว ภิกขู อะภิณหะสันนิปาตา ภะวิสสันติ สันนิปาตะพะหุลา วุฑฒิเยวะ ภิกขะเว ภิกขูนัง ปาฏิกังขา โน ปะริหานิ ฯ (๒) ยาวะกีวัญจะ ภิกขะเว ภิกขู สะมัคคา สันนิปะติสสันติ สะมัคคา วุฏฐะหิสสันติ สะมัคคา สังฆะกะระณียานิ กะริสสันติ วุฑฒิเยวะ ภิกขะเว ภิกขูนัง ปาฏิกังขา โน ปะริหานิ ฯ (๓) ยาวะกีวัญจะ ภิกขะเว ภิกขู อะปัญญัตตัง นะ ปัญญะเปสสันติ ปัญญัตตัง นะ สะมุจฉินทิสสันติ ยะถาปัญญัตเตสุ สิกขาปะเทสุ สะมาทายะ วัตติสสันติ วุฑฒิเยวะ ภิกขะเว ภิกขูนัง ปาฏิกังขา โน ปะริหานิ ฯ (๔) ยาวะกีวัญจะ ภิกขะเว ภิกขู เย เต ภิกขู เถรา รัตตัญญู จิระปัพพะชิตา สังฆะปิตะโร สังฆะปะรินายะกา เต สักกะริสสันติ คะรุกะริสสันติ มาเนสสันติ ปูเชสสันติ เตสัญจะ โสตัพพัง มัญญิสสันติ วุฑฒิเยวะ ภิกขะเว ภิกขูนัง ปาฏิกังขา โน ปะริหานิ ฯ (๕) ยาวะกีวัญจะ ภิกขะเว ภิกขู อุปปันนายะ ตัณหายะ โปโนพภะวิกายะ โน วะสัง คัจฉิสสันติ วุฑฒิเยวะ ภิกขะเว ภิกขูนัง ปาฏิกังขา โน ปะริหานิ ฯ (๖) ยาวะกีวัญจะ ภิกขะเว ภิกขู อารัญญะเกสุ เสนาสะเนสุ สาเปกขา ภะวิสสันติ วุฑฒิเยวะ ภิกขะเว ภิกขูนัง ปาฏิกังขา โน ปะริหานิ ฯ (๗) ยาวะกีวัญจะ ภิกขะเว ภิกขู ปัจจัตตัญเญวะ สะติง อุปัฏฐะเปสสันติ กินติ อะนาคะตา จะ เปสะลา สะพรัหมะจารี อาคัจเฉยยุง อาคะตา จะ เปสะลา สะพรัหมะจารี ผาสุง วิหะเรยยุนติ วุฑฒิเยวะ ภิกขะเว ภิกขูนัง ปาฏิกังขา โน ปะริหานิ ฯ
ยาวะกีวัญจะ ภิกขะเว อิเม สัตตะ อะปะริหานิยะกา ธัมมา ภิกขูนัง ฐัสสันติ อิเมสุ จะ สัตตะสุ อะปะริหานิเยสุ ธัมเมสุ ภิกขู สันทิสสิสสันติ วุฑฒิเยวะ ภิกขะเว ภิกขูนัง ปาฏิกังขา โน ปะริหานีติ ฯ
อิทะมะโวจะ ภะคะวา ฯ อัตตะมะนา เต ภิกขู ภะคะวะโต ภาสิตัง อะภินันทุนติฯ
ภิกขุ อะปะริหานิยะธัมมะสุตตัง นิฏฐิตัง ฯ